Xankəndi

Xankəndi — Azərbaycan Respublikasında şəhər. 1991-ci il dekabrın 25-dən 26-na keçən gecə Ermənistan Respublikası Silahlı Qüvvələri tərəfindən işğal edilmişdir. 1 yanvar 2014-cü il tarixinə olan rəsmi məlumatına əsasən Xankəndi şəhərinin 57 min nəfər əhalisi vardır. Xankəndi şəhəri Kərkicahan, Xanyurdu, Ərminavan, Malıbəyli və digər qəsəbələrlə həmsərhəddir. Şəhər ərazisində ən qədim tapıntılar eramızdan əvvəlki dövrlərə təsadüf edir. Lakin Xankəndi şəhərinin intibah dövrü XVIII əsrin axırlarında olub.
Qarqarçayının sahilində, Qarabağ silsiləsinin şərq ətəyində, Bakıdan 329 km aralıda yerləşir. Ərazisinin çox hissəsi dağlıq, dağətəyi zonada keçir. Buranın iqlimi əsasən mülayimdir. Xankəndi Azərbaycanın inkişaf etmiş sənaye mərkəzlərindən biri olmuşdur. Yüngül və yeyinti sənayesi inkişaf etmişdir. Elektrotexnika, avtomobil təmiri və asfalt-beton zavodları, mebel fabriki, tikinti materialları, sənaye, istehsalat və tədris istehsalat kombinatları vardı. Xankəndi şəhərində bir çox mədəniyyət yerləri olmuşdur. Şəhərdə 2 mədəniyyət evi, 2 musiqi məktəbi, 1 rəqs məktəbi, 1 rəsm məktəbi fəaliyyət göstərirdi.